ავტობუსების გაჩერებებზე ელექტრონული მაჩვენებლების მონტაჟი დაიწყო

თბილისის მერიამ ავტობუსების გაჩერებებზე თანამედროვე სტანდარტების შესაბამისი ელექტრონული მაჩვენებლების მონტაჟი დაიწყო. პირველ ეტაპზე ქალაქში 20 მაჩვენებელი დამონტაჟდა. აგვისტოს ბოლომდე კი მგზავრებით ყველაზე მეტად დატვირთულ 450 გაჩერებაზე მოსახლეობას შესაძლებლობა ექნება ზუსტად განსაზღვროს სასურველი მარშრუტის მოსვლის დრო და დროულად გადაადგილდეს.

თბილისის მერმა გიგი უგულავამ ჭავჭავაძის გამზირზე მდებარე ერთ–ერთ გაჩერებაზე დამონტაჟებული ელექტრონული მაჩვენებელი დაათვალიერა და მის მუშაობასა და დროის სიზუსტეს ადგილზე გაეცნო.

გიგი უგულავა: ეს ტაბლოები ონლაინ რეჟიმში მუშაობენ და მგზავებს აბსოლიტური სიზუსტით აწვდიან ინფორმაციას, თუ რამდენ წუთში მოვა მათთვის სასურველი ავტობუსი. ყოველივე ამას დახლოებით იგივე ეფექტი ექნება, რაც შუქნიშნებზე ციფერბლატებისა და წამზომების დაყენებამ მოგვცა. ეხლა სატესტო ვარიანტი ჩაიწერა და ელექტრონული მაჩვენებლები უკვე 20 გაჩერებაზე დამონტაჟდა. აგვისტოს ბოლომდე ქალაქში არსებულ ყველა ძირითად გაჩერებებზე, სადაც რამდენიმე ავტობუსი ერთდროულად მოძრაობს, კიდევ 450 ტაბლო დამონტაჟდება.

თბილისის მერმა სოფელ დიღომში გზის სარეაბილიტაციო სამუშაოები დაათვალერა და ადგილობრივ მოსახლეობას შეხვდა

თბილისის მერია ქალაქის საგზაო ინფრასტრუქტურის მოწესრიგებას განაგრძობს. თბილისის მერმა გიგი უგულავამ დღეს სოფელი დიღმის ცენტრალურ გზაზე მიმდინარე საგზაო სამუშაოები დაათვალიერა და ადგილობრივ მოსახლეობას შეხვდა. სამუშაოები სოფელ დიღომში დიდგორის ქუჩაზე 4 კილომეტრიან მონაკვეთზე მიმდინარეობს. საგზაო სამუშაოების დასრულების შემდეგ, სოფელი დიღმის მოსახლეობას წლების განმავლობაში არსებული გადაადგილების პრობლემა მოეხსნება.

გიგი უგულავა: როგორ იცით, სოფელი დიღომი რამოდენიმე წლის წინ შემოუერთდა თბილისს და როგორც ყველა შემოერთებულ სოფელს, რომელიც არსებითად თბილისთან იყო დაკავშირებული, მთელი რიგი პრობლემები გადმოყვა. დასუფთავება, განათება, კეთილმოწყობა და ნებისმიერი ინფრასტრუქტურა, რაც ქალაქისთვის არის დამახასიათებელი, ყველა ასეთ შემოერთებულ ტერიტორიაზე ძალიან პრობლემური იყო. ეტაპობრივად აქ გაკეთდა ახალი სკოლა, საბავშვო ბაღი, გაუმჯობესდა წყლის მიწოდება და უკვე დავიწყეთ ცენტრალური გზის კეთილმოწყობა. ეს არის დაახლოებით 4 კილომეტრიანი მონაკვეთი, რომელიც მთელ სოფელს აერთებს ქალაქთან. დარწმუნებული ვარ, რომ ნელ-ნელა სოფელი დიღმის მოსახლეობა თბილისის სრულფასოვან მოსახლეობად იგრძნობს თავს, ისე რომ ის ალტენტური ცხოვრების წესი, რაც სოფელი დიღმისთვისაა დამახასიათებელი შენარჩუნებული იქნება.

გიგი უგულავამ ძველ თბილისში ფოტო-ფესტივალი დაათვალიერა

ევროპის კვირეულის ფარგლებში, თბილისის მერიისა და კულტურის სამინისტროს მხარდაჭერით და ევროპის სახლისა და თბილისის ფოტოგრაფიის სახლის ინიციატივით, თბილისის ფოტო-ფესტივალი წელს მეორედ ჩატარდა. ფესტივალის ფარგლებში 29 მაისს ძველ თბილისში გამოფენა “ფოტოგრაფიის ღამე” იქნა წარმოდგნილი. დამთვარიელებელს აბანოთუბნიდან გუდიაშვილის ბაღამდე, ღია ცის ქვეშ ინსტალირებულ 10 ეკრანზე შესაძლებლობა ჰქონდა გასული წლის მსოფლიოს წამყვანი ფოტო სააგენტოების, საერთაშორისო გამოცემების, ფოტოკოლექტივებისა და საინფორმაციო სააგენტოების ფოტოპროდუქცია დაეთვალიერებინა. გამოფენაზე ასევე წარმოდგენილი იყო ცნობილი ქართველი, აზერბაიჯანელი, სომეხი, რუსი, თურქი და ირანელი ავტორების ნამუშევრები.

გიგი უგულავა:თბილისის ღია ფოტო-ფესტივალი შარშან დაიწყო და ის უკვე თბილისის კულტურული ცხოვრების მნიშვნელოვან ნაწილად იქცა. გამოფენის ეს ფორმა ქალაქ არლიდან მოდის, საავტორო უფლება რა თქმა უნდა ორგანიზატორებს დარჩათ, ჩვენ კი გვაქვს საშუალება მათი თანხმობით ჩავატაროთ ეს ღონისძიება. წარმოდგენილია ბევრი საინტერესო ფოტო მასალა. რაც მთავარია ფესტივალი უფრო და უფრო მასშტაბური ხდება და კარგია, რომ მთლიანობაში ის ევროპის დღეების კონტექსტში ჩაჯდა და კარგად ჩაეწერა მაისის თბილისის ერთ-ერთ სასიამოვნო საღამოდ.

თბილისის ზღვაზე “ოლიმპიური სოფელი” აშენდება

2015 წელს ევროპის ახალგაზრდული ოლიმპიური ფესტივალი თბილისში გაიმართება. შესაბამისად ქალაქში სპორტული ინფრასტრუქტურის განვითარება მიმდინარეობს, რაც არსებული სპორტული ცენტრების სრულ რეაბილიტაციასა და მათ საერთაშორისო სტანდარტებთან შესაბამისობას გულისხმობს.ინფრასტრუქტურის განვითარების ერთ–ერთი მნიშვნელოვანი ნაწილი თბილისის ზღვის მიმდებარე ტერიტორიაზე „ოლიმპიური სოფლის“ მშენებლობაა. „ოლიმპიური სოფელი“ 5 ჰექტარზე გაშენდება. ტერიტორიაზე დაახლოებით 50 ობიექტი აშენდება. ეს იქნება: ადმინისტრაციული შენობა, საკონფერენციო დარბაზი, საცხოვრებელი სახლები, სასადილო და გასართობი ცენტრები. შენობები ორ–სამ სართულიანი იქნება, თითოეულ სართულზე მინიმუმ რვა ოთახი განთავსდება, რომელშიც ოთხი ადამიანი იცხოვრებს. კომფორტულ და თანამედროვე დიზაინის სახლებში ასევე გათვალისწინებული იქნება მწვრთნელებისა და ხელმძღვანელების ოთახებიც. ოლიმპიური სოფელში ერთდროულად 4 000 სპორტსმენი იცხოვრებს. ტერიტორიაზე ყველა საჭირო სხვა ინფრასტრუქტურაც მოეწყობა.თბილისის მერი გიგი უგულავა საქართველოში სამუშაო ვიზიტით მყოფ ევროპის ოლიმპიური კომიტეტების აღმასკომის წევრს, ბელგიის ოლიმპიური კომიტეტის მდივანს გვიდო დე ბონდის და სლოვაკეთის ოლიმპიური კომიტეტის გენერალურ მდივანს ჟოზეფ ლიბოს შეხვდა. გიგი უგულავამ სტუმრებს თბილისის ზღვაზე დაგეგმილი „ოლიმპიური სოფლის“ მშენებლობის სამომავლო გეგმები გააცნო. სლოვაკეთის ოლიმპიური კომიტეტის გენერალური მდივანი ჟოზეფ ლიბო თბილისში ახალგაზრდული ოლიმპიური ფესტივალის ჩატარების მიზნით, მიმდინარე სამუშაოებს უშუალოდ გაუწევს მეთვალყურეობას და თბილისში ყოველ ექვს თვეში ერთხელ ჩამოვა. სამუშაო ვიზიტის ფარგლებში სტუმრები თბილისში არსებულ სპორტულ ინფრასტრუქტურას გაეცნობიან და საქართველოს ოლიმპიური კომიტეტის წევრებთან შეხვედრებს გამართავენ.

გიგი უგულავა: 2015 წელს თბილისი ახალგაზრდულ ოლიმპიურ ფესტივალს მასპინძლობს, ამიტომ მოსამზადებელი სამუშაოები ჩვევ უკვე დავიწყეთ. წელიწადში ორჯერ, სპეციალური კომისია ჩამოვა და დასკვნას დაწერს, თუ რამდენად ემზადება ქალაქი ოლიმპიადისთვის. ძალიან დიდია ამ ღონისძიების მნიშვნელობა ქალაქისათვის, ამიტომ მომზადებაც მიმდინარეობს აქტიურად. ოლიმპიური სოფელი, რომელიც 4 000 ახალგაზრდა სპორტსმენს უმასპინძლებს, სწორედ აქ, თბილისის ზღვისკენ აშენდება. ეს ადგილი ძალიან მიმზიდველია ყველა პარამეტრით. წელს ვიწყებთ ბულვარის მშენებლობას და უკვე გაისად ოლიმპიური სოფლის მშენებლობაც დაიწყება. პარალელურად მიდის მომზადება სხვადასხვა სპორტული ინფრასტრუქტურის, რომელიც აუცილებელი იქნება ტურნირისთვის. ბუნებრივია ეს უკვე მერიის ნაწილი არ არის, მაგრამ მთავარი ახლა არის ის, რომ ჩვენი ახალგაზრდა სპორტსმენებიც მოემზადონ, რათა მარტო კი არ ვუმასპინძლოთ, არამედ წარმატებასაც მივაღწიოთ.

რიყეზე მუსიკისა და დრამის თეატრისა და საგამოფენო დარბაზის მშენებლობას ჩაეყარა საფუძველი

რიყის რეაბილიტაციის პროექტის ფარგლებში, რიყის პარკის განაშენიანება დასრულდა, რომელსაც საქართველოს რუქის ფორმა აქვს და საფეხმავლო ბილიკებით თითოეულ რეგიონს აერთიანებს.

საქართველოს პრეზიდენტმა მიხეილ სააკაშვილმა და თბილისის მერმა გიგი უგულავამ რიყის პარკი დაათვალიერეს და მის მიმდებარედ, მუსიკისა და დრამის თეატრისა და საგამოფენო დარბაზის მშენებლობას ჩაუყარეს საფუძველი. აღნიშნული ობიექტის მშენებლობა ორ წელიწადში დასრულდება. შენობის პროექტი იტალიელ არქიტექტორს მასიმილიანო ფუქსასს ეკუთვნის. არქიტექტორი რიყის ტერიტორიის უკეთ შესწავლისა და დათვალიერების მიზნით, პირადად იმყოფებოდა თბილისში, რათა მისი პროექტი რიყის განაშენიანების გეგმაში სრულყოფილად ჩამჯდარიყო.

თბილისის მერიამ რიყის, როგორც ქალაქის ძველი, ისტორიული ნაწილის კომპლექსური განვითარებისა და განაშენიანების კონცეფციაზე მუშაობა 2009 წელს დაიწყო. პროგრამა რამდენიმე მასშტაბურ პროექტს მოიცავს. მათ შორის ყველაზე მნიშვნელოვანი რიყის პარკის ლანდშაფტური არქიტექტურისა და მისი ინფრასტრუქტურის მშენებლობაა, რომელიც სივრცის ძირითად ნაწილს მოიცავს და ტერიტორიისათვის რეკრეაციული ფუნქციის ჩამოყალიბებას უზრუნველყოფს. პარკის მთავარი განმსაზღვრელი და მახასიათებელი: მწვანე არქიტექტურა და დამაკავშირებელი საფეხმავლო ბილიკებია. პარკის ტერიტორიაზე მცირე საბავშვო მოედნები, დასასვენებელი ადგილები და ამფითეატრი მოეწყო, სადაც სხვადასხვა მუსიკალური და გასართობი ღონისძიებები გაიმართება. ტერიტორია სხვადასხა ტიპისა და ზომის სანათი საშუალებებით განათდა. რიყის პარკში დამსვენებლისთვის კომფორტული და სასიამოვნო გარემოა შექმნილი. რიყის პარკის ერთ-ერთი მთავარი განმსაზღვრელი აქცენტი სამგანზომილებიანი გამოსახულებების მოძრავი მუსიკალური შადრევანია, რომელიც მთავარი საფეხმავლო მოედნით „მშვიდობის ხიდსა“ და ავლაბრის გვირაბის ახალი სეგმენტის სახურავზე მოწყობილ პრომენადეს უკავშირდება. გვირაბის სახურავი გამოყენებულია პარკის ერთ-ერთ ელემენტად და ინტეგრირებულია მთლიან სივრცესთან. რიყის სივრცითი გეგმარების კონცეფციის შემადგენელ ნაწილს „მშვიდობის ხიდი“ წარმოადგენს, რომელიც რიყის პარკს მდინარე მტკვრის მარჯვენა სანაპიროსთან, ერეკლე II –ს, შავთელის, ჩახრუხაძის, ლესელიძის ქუჩებთან, მეიდანთან, კალასთან და აბანოთუბანთან აკავშირებს. მითითებული ქუჩები და უბნები ძველი თბილისში ერთ-ერთ ძირითადი ტურისტულ მარშუტს წარმოადგენს, შესაბამისად ნებისმიერი ტურისტისათვის და დაინტერესებული პირისთვის შესაძლებელია დროის მცირე მონაკვეთში, ავლაბრის მოედნიდან რიყის პარკში კიბით ჩასვლა და „მშვიდობის ხიდის“ გადაკვეთით აღნიშნულ ქუჩებთან დაკავშირება. რიყეზე ასევე მიმდინარეობს ერთდონიანი, 320 ავტომობილზე გათვლილი ავტოსადგომის მშენებლობაც, რომელიც მოძრაობას განტვირთავს და ქალაქის უძველეს ნაწილში ავტომობილების პარკირების პრობლემას მოაგვარებს.

რიყის სრული რეაბილიტაციის პროგრამა 2012 წელს დასრულდება.

თბილისის მერი მსოფლიო ალაფის გახსნას დაესწრო

თბილისში 24 მაისიდან 5 ივნისის ჩათვლით, ოცწლამდელთა ასაკის მსოფლიო ალაფი გაიმართება. ჩემპიონატში 8 ქვეყნის: საქართველოს, კანადის, ამერიკის შეერთებული შტატების, იაპონიის, ზიმბაბვეს, ურუგვაის, სამოასა და რუსეთის წარმომადგენლები მიიღებენ მონაწილეობას. ოთხი სათამაშო დღის განმავლობაში 16 მატჩი გაიმართება. გამარჯვებული ქვეყნის ნაკრები 2012 წელს კეიპტაუნში გასამართი მსოფლიო ასპარეზობის საგზურს მიიღებს და სარაგბო ელიტის გუნდებს შეერკინება.

მსოფლიო ალაფის გახსნას თბილისის მერი გიგი უგულავა დაესწრო და მის მონაწილეებსა და სტუმრებს სიტყვით მიმართა.

გიგი უგულავა: სასიხარულოა, რომ ჩვენ გვაქვს საშუალება შევიკრიბოთ და ვუგულშემატკივროთ ჩვენს გუნდს. ეს დიდი სპორტული დღესასწაულია და რაც მთავარია წინაპირობაა, რომ ჩვენ კიდევ უფრო მეტი სპორტიული ღონისძიების მასპინძლობას შევძლებთ. მინდა მივულოცო ეს დღე ჩვენს რაგბის კავშირს და კიდევ უფრო მეტი წარმატება ვუსურვო მათ. თქვენ კი ძვირფასო მეგობრებო, გისურვებთ ერთადერთს – გამარჯვებას.

თბილისის მერმა გიგი უგულავამ პროექტ „ძველი თბილისის ახალი სიცოცხლის“ ფარგლებში დასრულებული მშენებლობა დაათვალიერა

 ეკონომიკის სტიმულირების, მოსახლეობის საცხოვრებელი პირობების გაუმჯობესების, ძველი თბილისის რეაბილიტაციისა და ახალი სამუშაო ადგილების შექმნის მიზნით დაწყებული, თბილისის მერიის პროექტი “ძველი თბილისის ახალი სიცოცხლე” ქალაქში წარმატებით ხორციელდება.

თბილისის მერმა გიგი უგულავამ „ძველი თბილისის ახალი სიცოცხლის“ მეორე ეტაპის ფარგლებში, ამხანაგობა „გუნია 22“–ის მიერ, ვერაზე დასრულებული მშენებლობა დაათვალიერა და იმ ოჯახების წარმომადგენლებს შეხვდა, რომლებიც აღნიშნულ საცხოვრებელ სახლში ახალი, კომფორტული ბინებით დაკმაყოფილდნენ.

ამხანაგობა „გუნია 22“–მა პროექტ “ძველი თბილისის ახალი სიცოცხლის” მეორე ეტაპში მიიღო მონაწილეობა და ვერაზე, გუნიას ქუჩაზე 215 კვ.მეტრ ტერიტორიაზე ოთხ სართულიანი სახლის მშენებლობა დაასრულა.

ახალ კორპუსში თანამედროვე და კომფორტული ბინებით, დოლაბაურის ქუჩაზე ავარიულ სახლებში მცხოვრები ექვსი ოჯახი დაკმაყოფილდა.

აღნიშნული მშენებლობის დასასრულებლად ამხანაგობა „გუნია 22“–ს “ბაზის ბანკმა” „ძველი თბილისის ახალი სიცოცხლის“ ფარგლებში 160 000 დოლარის ოდენობით სესხი გამოუყო.მშენებლობაზე 30 ადამიანი დასაქმდა.

“ძველი თბილისის ახალი სიცოცხლის“ მესამე ეტაპი თბილისი მერიამ ერთი თვის წინ გამოაცხადა. მოდიფიცირებული პროექტი უფრო ფართომასშტაბიანია და მის ფარგლებში ნებისმიერ სამშენებლო კომპანიას, რომელსაც ახალი მშენებლობის დაწყება ან შეჩერებულის დასრულება სურს, თბილისის მერია ნასყიდობის ხელშეკრულებას წინასწარ გაუფორმებს.

ხელშეკრულების თანახმად, სამშენებლო ობიექტის ექსპლუატაციაში მიღებიდან ერთი წლის განმავლობაში მერია ერთ კვადრატულ მეტრს 400 აშშ დოლარის ექვივალენტით ლარში შეისყიდის, რაც ნიშნავს, რომ დასრულებულ მშენებლობას გარანტირებული მყიდველი ეყოლება. შესაბამისად კომერციული ბანკები სამშენებლო კომპანიებს, რომელთაც თბილისის მერიასთან ნასყიდობის ხელშეკრულება ექნებათ გაფორმებული, მარტივად გამოუყოფენ საჭირო ოდენობის კრედიტს, რადგან მერიასთან გაფორმებული ხელშეკრულება ბანკისთვს კრედიტის დროულად დაფარვის გარანტიაა. პროექტის ახალი ეტაპის ხანგრძლივობა ერთი წელია. ნებისმიერ დაინტერესებულ სამშენებლო კომპანიას თბილისის მერია ნასყიდობის ხელშეკრულებას აღნიშნული დროის განმავლობაში გაუფორმებს.

“ძველი თბილისის ახალი სიცოცხლე” საუკეთესო მაგალითია, თუ როგორ უნდა განვითარდეს კერძო სექტორი, შეიქმნას სამუშაო ადგილები, დასრულდეს შეჩერებული ობიექტების მშენებლობა და გაუმჯობესდეს მოსახლეობის საცხოვრებელი პირობები.

გიგი უგულავა: ბევრი პრობლემაა, რომელიც თბილისელებს აწუხებთ. ერთ-ერთი ასეთი პრობლემა არის ავარიული ბინები, რომლებიც ისტორიულად მოყვება თბილისს. სწორედ ამიტომ, ჩვენ დავიწყეთ პროგრამა ძველი თბილისის ახალი სიცოცხლე. გარდა სამუშაო ადგილების შექმნის და მთლიანად სამშენებლო სფეროს წახალისებისა, ხდება ასევე ავარიული ბინებიდან მოსახლეობის ეტაპობრივად გამოყვანა და ახალ კომფორტულ ბინებში გადაყვანა. დაახლოებით 350 ოჯახმა უკვე მიიღო ახალი ბინა და გააგრძელა ახალ ბინაში ცხოვრება. ასევე ეს პროგრამა გრძელდება ახალი სახით. ჩვენ გამოვაცხადეთ, რომ დასრულებულ, ექსპლუატაციაში მიღებულ ბინაში თბილისის მერია მზად არის წინარე ნასყიდობის ხელშეკრულება გაუფორმოს მშენებელს და 400 დოლარის ექვივალენტი ლარში გადაიხადოს კვადრატულ მეტრში. ეს რეალურად არის მშენებლისთვის უფასო გარანტია იმისათვის, რომ ადვილად მოიზიდოს ფინანსური რესურსი ბანკებიდან და ბანკისთვისაც უსაფრთხო იყოს ფულის მშენებლობაში დაბანდება. ამ პროექტით უკვე დაახლოებით 40 მილიონ დოლარზე მეტის პროექტი არის შემოსული ჩვენთან და განხილვის სტადიაში გვაქვს. წელს ვვარაუდობთ, რომ 200 მილიონი ლარის დამატებითი ინვესტიცია განხორციელდება სამშენებლო სფეროში, რაც საბოლოო ჯამში დაახლოებით 1500-2000 სამუშაო ადგილს ნიშნავს ამ სექტორში. ამიტომ მიმაჩნია ეს პროგრამა, რომ არის ერთ-ერთი ის საშუალება, რომლითაც შევძლებთ სამშენებლო სფერო ეტაპობრივად გამოვიყვანოთ კრიზისიდან.

გლდანში პოლიციის ახალი შენობა გაიხსნა

თბილისს პოლიციის ახალი, თანამედროვე ტექნიკით აღჭურვილი შენობა შეემატა. ახალი განყოფილება ომარ ხიზანიშვილის ქუჩაზე აშენდა. გლდანი – ნაძალადევის რაიონის პოლიციის პირველი განყოფილებაში 52 თანამშრომელი იმუშავებს და გლდანის „ა“ , პირველი, მეორე, მესამე და მეოთხე მიკრო–რაიონების მოსახლეობას მოემსახურება.

უახლოეს მომავალში თბილისში პოლიციის კიდევ ორი ახალი შენობა აშენდება. პროექტი შინაგან საქმეთა სამინისტროს ინფრასტრუქტურის განვითარების ნაწილია. პოლიციის ახალი განყოფილების მიმდებარე ტერიტორია თბილისის მერიამ კეთილმოაწყო. დაიგო ასფალტის საფარი, ქვაფენილი, მოეწყო პარკირების ადგილები და შენობის ირგვლივ არსებული ტერიტორია გამწვანდა. შენობის გახსნას თბილისის მერი გიგი უგულავა და შინაგან საქმეთა მინისტრი ივანე მერაბიშვილი დაესწრნენ.

გიგი უგულავა: გლდანი არა მარტო თბილისში, არამედ მთელ საქართველოში ყველაზე დიდი რაიონია. პრაქტიკულად გლდანი წარმოადგენს ქალაქში ქალაქს, ამიტომ მას ყველაზე მეტად სჭირდება ქალაქისთვის დამახასიათებელი ყველა ინფრასტრუქტურა, მათ შორის უსაფრთხოებისთვის პოლიციის შენობა, რომელიც მთლიანად ლუწ და კენტ მიკრორაიონებს მოიცავს. აღნიშნულ ტერიტორიაზე პარკის შემდეგ პოლიცია გაიხსნა, ასევე მიმდებარე ტაძრამდე “სმარტის” სუპერმარკეტების ქსელი და გასართობ-დასასვენებელი ინფრასტრუქტურა კეთდება. ანუ, ფაქტიურად, უსაფრთხოებისა და გართობა-დასვენების თვალსაზრისით გლდანელებისთვის ეს იქნება ერთ-ერთი ყველაზე მიმზიდველი ადგილი. ამით ჩვენ ვაგრძელებთ იმ პროგრამას, რასაც უსაფრთხო ქალაქი ჰქვია, რაც შინაგან საქმეთა სამინისტროსთან ერთად, პოლიციის ქვეგანყოფილებებისა და სამართველოების რეაბილიტაციას და ახალი სამუშაო სტანდარტის დანერგვას გულისხმობს. მინდა ეს დღე მივულოცო გლდანელებს, ვინაიდან ამიერიდან გლდანი უფრო უსაფრთხო უბანი გახდება.

გიგი უგულავამ გზის სარეაბილიტაციო სამუშაოები დაათვალიერა

თბილისის მერია ქალაქის ინფრასტრუქტურის განვითარებას განაგრძობს. თბილისის მერმა გიგი უგულავამ დღეს ისანი–სამგორის რაიონში მიმდინარე საგზაო სამუშაოები დაათვალიერა და ადგილობრივ მოსახლეობას შეხვდა. მოსკოვის გამზირის მე–4 კვარტალში 4 700კვ.მეტრ ტერიტორიაზე ასფალტის საფარი იგება და ბეტონის ბორდიურები კეთდება. რეაბილიტაცია ჩაუტარდა და მოწესრიგდა მიწისქვეშა კომუნიკაციების სისტემაც. სამუშაოები 10 დღეში დასრულდება და მიმდებარე ტერიტორიაზე მცხოვრებ მოსახლეობას წლების განმავლობაში არსებული გადაადგილების პრობლემა მოეხსნება. უახლოეს მომავალში აღნიშნულ ტერიტორიაზე დასასვენებელი სკვერისა და საბავშვო ატრაქციონების მოწყობა იგეგმება.

გიგი უგულავა: ჩვენ დავიწყეთ პროგრამა „ძველი თბილისის ახალი სიცოცხლე“, რომლის ფარგლებში ახლადაშენებული ბინების ნაწილი შეიძლება ქალაქის საბინაო ფონდის მფლობელობაში გადმოვიდეს და ამ ფონდიდან ავარიულ სახლებში მცხოვრები მოსახლეობა დაკმაყოფილდეს. ავარიული სახლების პრობლემა ქალაქის ყველა რაიონს აქვს და ჩვენ წელიწადში დაახლოებით სამ მილიონ ლარს ვხარჯავთ ამ სახლებიდან გამოყვანილი მოსახლეობის ქირის გადასახდელად. სწორედ ამიტომ უმჯობესია ეს პრობლემა კომპლექსურად მოვაგვაროთ. ცალკე თემაა დევნილების პრობლემების გადაჭრა. ამჟამად მიმდინარეობს მათი ფართების დაკანონება და შესაბამისად ამხანოგეობების ჩამოყალიბება, რაც მათ შესაძლებლობას მისცემს ყველა იმ პროექტით ისარგებლონ, რომელსაც თბილისის მერია აფინანსებს. დევნილი არა სოციალური სტატუსი, არამედ მხოლოდ – პოლიტიკური სტატუსი უნდა იყოს.

თბილისის მერიის მხარდაჭერით, ეთნოგრაფიულ მუზეუმში „ახალი ღვინის ფესტივალი“ გაიმართა

თბილისის მერიის მხარდაჭერით, ეთნოგრაფიულ მუზეუმში „ახალი ღვინის ფესტივალი“ გაიმართა, რაც ქართული ღვინის ცნობადობის გაზრდასა და პოპულარიზაციას ისახავს მიზნად. ფესტივალში ღვინის მწარმოებელი მსხვილი კომპანიები და მცირე მარნები მონაწილეობდნენ. ღვინის ფესტივალი თბილისის მერმა გიგი უგულავამ დაათვალიერა, წარმოდგენილ პროდუქციას გაეცნო და ფესტივალის მონაწილეებს გაესაუბრა. "ღვინის კლუბმა" დეგუსტაციის წესით ორმოცზე მეტი ოჯახური მარანი შეარჩია, რომლებიც ფესტივალზე იშვიათი ქართული ვაზის ჯიშის ყურძნისგან დაწურულ ღვინოებს წარმოადგენენ. სხვადასხვა ღვინის მრავალფეროვნების გარდა წლევანდელი ფესტივალი ქვევრის ღვინის სიუხვითაც გამოირჩევა. ფესტივალის ერთ-ერთი მთავარი შემეცნებით-გასართობი სანახაობა ეთნოგრაფიული მუზეუმის ეზოში ჭურის მოხდა და მისი ღვინის დეგუსტაცია იყო.

ღვინის ფესტივალები მეღვინეობის ტრადიციების მქონე ყველა ქვეყანაში არსებობს. საქართველოში "ღვინის კლუბის" ინიციატივით, აღნიშნული ფესტივალი პირველად გასულ წელს ჩატარდა და 3 ათასზე მეტ სტუმარს უმასპინძლა. სტუმრების დიდ ნაწილს ღვინით დაინტერესებული პირები და ის მომხმარებლები წარმოადგენდნენ, რომლებიც ცდილობენ უკეთ შეისწავლონ ქართული ღვინო. ფესტივალს ბევრი უცხოელი სტუმარი ჰყავდა და დღეს ისინი აქტიურ როლს თამაშობენ ქართული ღვინის პოპულარიზაციის საქმეში. ფესტივალში მონაწილეობა მნიშვნელოვანი აღმოჩნდა და დიდი სტიმული მისცა ოჯახურ მარნებს, რადგან რამდენიმე მათგანმა უკვე ჩამოასხა ღვინო და ქართულ ბაზარზე საკუთარი ადგილი დაიმკვიდრა. ფესტივალის მონაწილეებს სპეციალური სერტიფიკატები და "ღვინის კლუბის" სამახსოვრო საჩუქრები გადაეცათ.

გიგი უგულავა: ღვინო ჩვენი კულტურისა და იდენტურობის ნაწილია. ფესტივალი, რომელიც თბილისში დაფუძნდა და ეთნოგრაფიულ მუზეუმში ტარდება, უკვე ტრადიციული გახდა. ბოლო წლებში, მას შემდეგ, რაც რუსეთში ქართული ღვინო აიკრძალა, მან სხვადასხვა ქვეყნის ბაზრები მოიცვა და ისეთ ქვეყნებში, სადაც ქართველ ადამიანს შეიძლება ფეხი საერთოდ არ დაუდგამს და არც რომელიმე შემოქმედებითი კულტურული ღონისძიება გამართულა, იქ ქართულმა ღვინომ სახელი უკვე გაითქვა. ღვინის პოპულარიზაცია ძალიან მნიშვნელოვანია და ეს ფესტივალიც ბუნებრივია ამას უწყობს ხელს.

თბილისის მერი მახათას მთაზე ივერიის ღვთისმშობლის ტაძრისა და სავანის საძირკველის კურთხევას დაესწრო

თბილისის მერი მახათას მთაზე ივერიის ღვთისმშობლის ტაძრისა და სავანის საძირკველის კურთხევას დაესწრო წყარო: თბილისის მერიის საზოგადოებასთან და მედიასთან ურთიერთობის სამსახური წმინდა ანდრია პირველწოდებულის ხსენების დღეს, 12 მაისს, მახათას მთაზე საქართველოს კათოლიკოს-პატრიარქმა უწმინდესმა და უნეტარესმა, მცხეთა-თბილისის მთავარეპისკოპოსმა, ბიჭვინთისა და ცხუმ-აფხაზეთის მიტროპოლიტმა ილია მეორემ, ივერიის ღვთისმშობლის ტაძრისა და სავანის საძირკველი აკურთხა. კურთხევის რიტუალს კრეტის მთავარეპისკოპოსი ირინეოსი, იკონიის მიტროპოლიტი თეოლიპტე, ათონის მთის დელეგაცია და ზაგორსკისა და კიევის მღვიმის ლავრების წარმომადგენლები დაესწრნენ. პირველი შემოწირულობა მახათას მთაზე ტაძრის ასაშენებლად უწმინდესმა და უნეტარესმა ილია II–მ თავისი წინაპრების, საქართველოს მეფეებისა და პატრიარქების სახელზე გაიღო. აქციაში ამჟამად 108 000 პირია გაწევრიანებული, ისინი ყოველთვიურად რიცხავენ თანხას მახათას მთაზე ტაძრის ასაგებად. საქართველოს კათოლიკოს-პატრიარქის ლოცვა-კურთხევით, 2002 წელს მახათას მთაზე მამათა მონასტერი დაარსდა და ათონის მთის ივერთა მონასტრის ქტიტორების: იოანე, ექვთიმე და გიორგი მთაწმინდელების სახელობის ტაძარი აშენდა.

ივერიის ღვთისმშობლის ტაძრის აგებაში მონაწილეობა ნებისმიერ მსურველს შეუძლია. მშენებლობის ანგარიში გახსნილია საქართველოში მოქმედ ყველა ბანკში. ნებისმიერ პირს შეუძლია მისთვის სასურველ ბანკში მხოლოდ ერთხელ მისვლა და ავტომატური დავალების მომსახურების მეშვეობით, წმინდა სავანის მშენებლობის დასრულებამდე აქციაში ჩართვა. ამის შემდეგ მისი ანგარიშიდან თვეში ერთხელ ავტომატურად ჩამოიჭრება წინასწარ მითითებული თანხა და გადავა ტაძრის მშენებლობის ანგარიშზე. მახათას მთაზე ივერიის ღვთისმშობლის ტაძრისა და სავანის საძირკველის კურთხევას თბილისის მერი გიგი უგულავა დაესწრო და შეკრებილ საზოგადოებას სიტყვით მიმართა.

გიგი უგულავა: ამ ადგილს დიდი მნიშვნელობა აქვს თითოეული თბილისელისთვის, ვინაიდან ისტორიულად მონასტრები ატარდებდნენ საგანმანათლებლო და სოციალურ ფუნქციას. ეკლესია–მონასტრები იყო ის ადგილი, სადაც ადამიანი ინკურნებოდა სულიერად და ხორციელად. ამიტომ ამ მშენებლობას დიდი მშენებლობა აქვს. ის იწყება დღეს და იწყება თითოეული თქვენთაგანის მონაწილეობით.

თბილისის მერი გიგი უგულავა "მერკური 2011” დაჯილდოებას დაესწრო

საქართველოს ეკონომიკისა და მდგრადი განვითარების სამინისტროსა და ეროვნულ საინვესტიციო სააგენტოს ინიციატივით, ბიზნეს-დაჯილდოება "მერკური 2011"გაიმართა, რომელიც მიზნად ისახავდა ქართული ბიზნესის წარმოჩენას, მის წახალისებას და პოპულარიზაციას. ეროვნული ბიზნეს- დაჯილდოებაში მონაწილეობა მიიღეს, როგორც მცირე და საშუალო, ასევე მსხვილი ბიზნესის წარმონადგებლებმა. ბიზნეს-დაჯილდოვების ცერემონია "მერკური 2011"-ს თბილისის მერი გიგი უგულავა დაესწრო და ნომინაციაში წლის აღმოჩენა - კომპანია “ბარამბოს“ დირექტორი იაგო ჩოჩელი დააჯილდოვა.

თბილისის მერმა გიგი უგულავამ კომპანია “დექსუსის” მიერ დასრულებული მშენებლობა დაათვალიერა და იქ მცხოვრებ მოსახლეობას შეხვდა

კომპანია „დექსუსმა“ კიდევ ერთი შეჩერებული პროექტის მშენებლობა დაასრულა. ხოშარაულის ქუჩაზე წლების განმავლობაში შეჩერებული 8 სართულიანი საცხოვრებელი და სავაჭრო კომპლექსის სამშენებლო სამუშაოები კომპანიამ 2010 წლის ოქტომბერში განაახლა.

მშენებლობის დასრულებით ახალი საცხოვრებელი ბინებითა და კომერციული ფართით ის 315 მომხმარებელი დაკმაყოფილდა, რომელიც წლების განმავლობაში შეჩერებული მშენებლობის დასრულებას ელოდნენ. კომპანიამ აღნიშნული ობიექტის მშენებლობაში მილიონ ნახევარი ლარის ინვესტიცია განახორციელა.

"დექსუსმა" სამშენებლო ბაზრის ერთ–ერთი ყველაზე დიდი სამშენებლო კომპანიის, „ცენტრ პოინტის“ ჯგუფის 100%-ანი წილი მართვაში 2010 წლის სექტემბერში აიღო. შემუშავდა „ცენტრ პოინტის“ რეაბილიტაციის გეგმა, რომლის თანახმად 2012 წლის აპრილამდე მომხმარებლების 51,5% დაკმაყოფილდება. „დექსუსმა“ 5 პროექტის მშენებლობა უკვე დაასრულა და 625 მომხმარებელი დააკმაყოფილა. ამჟამად კომპანია სამშენებლო სამუშაოებს 4 ობიექტზე აწარმოებს. ყველა მიმდინარე პროექტებზე სამუშაოები 2011 წლის განმავლობაში დასრულდება.

თბილისის მერმა გიგი უგულავამ “დექსუსის“ მიერ დასრულებული მშენებლობა დაათვალიერა, აღნიშნულ საცხოვრებელ კომპლექსში ახალი ბინებით დაკმაყოფილებულ მოსახლეობას შეხვდა და თბილისის მერიის პროექტის: „ძველი თბილისის ახალი სიცოცხლის“ ახალი ეტაპის პრიორიტეტებსა და მიმდინარეობაზე ესაუბრა.

პროექტი - “ძველი თბილისის ახალი სიცოცხლე”, რომელიც სამშენებლო სფეროსა და მისი მომიჯნავე ბიზნეს სექტორის სტიმულირებას, ახალი სამუშაო ადგილების შექმნას, მოსახლეობის საცხოვრებელი პირობების გაუმჯობესებასა და ეკონომიკური აქტივობის ზრდას ითვალისწინებს, ერთი თვეა ახალ ეტაპზე გადავიდა. ის უფრო მასშტაბურია და ნებისმიერ სამშენებლო კომპანიას, რომელსაც ახალი მშენებლობის დაწყება ან შეჩერებულის დასრულება სურს, თბილისის მერია ნასყიდობის ხელშეკრულებას წინასწარ გაუფორმებს. ხელშეკრულების თანახმად, სამშენებლო ობიექტის ექსპლუატაციაში მიღებიდან ერთი წლის განმავლობაში მერია ერთ კვადრატულ მეტრს 400 აშშ დოლარის ექვივალენტით ლარში შეისყიდის, ანუ დასრულებულ მშენებლობას გარანტირებული მყიდველი ეყოლება. სამშენებლო კომპანიებს ასევე შესაძლებლობა ექნებათ, უკეთესი ფასის შეთავაზების შემთხვევაში, ფართი ნებისმიერ სხვა დაინტერესებულ პირს მიყიდონ. კომერციული ბანკები სამშენებლო კომპანიებს, რომელთაც თბილისის მერიასთან ნასყიდობის ხელშეკრულება ექნებათ გაფორმებული, მარტივად გამოუყოფენ საჭირო ოდენობის კრედიტს, რადგან მერიასთან გაფორმებული ხელშეკრულება ბანკისთვის კრედიტის დროულად დაფარვის გარანტიაა.

ბინებს, რომლებსაც თბილისის მერია სამშენებლო კომპანიებისგან შეისყიდის მერიაში შექმნილი “უძრავი ქონების განვითარების ფონდი” განკარგავს და იმ თბილისელებზე გაანაწილებს, რომლებიც უკიდურესად ავარიულ სახლებში ცხოვრობდნენ და დღემდე მერია მათ ქირით აკმაყოფილებს. გამოთავისუფლებული ტერიტორიის განვითარებაზე ადგილობრივი ხელისუფლება იზრუნებს. პროექტის ხანგრძლივობა ერთი წელია. დაინტერესებულ სამშენებლო კომპანიებთან თბილისის მერია ნასყიდობის ხელშეკრულებას აღნიშნული დროის განმავლობაში გააფორმებს.

გიგი უგულავა: მივესალმები ამ პროექტის დასრულებას. ბუნებრივია მე ისევე, როგორც თითოეულმა თქვენთაგანმა, კარგად ვიცი, რომ კრიზისის შედეგად ძალიან ბევრ მშენებლობას შეექმნა პრობლემები. ბევრი კომპანია გაკოტრების პირას მივიდა, მშენებლობები შეჩერდა, ნაწილი კი საერთოდ უპერსპექტივო აღმოჩნდა. თუ ვისაუბრებთ კრიზისზე, ბუნებრივია ნებისმიერ კრიზისს აქვს თავისი გამომწვევი მიზეზი, ისევე როგორც, საბოლოო ჯამში არ არსებობს სიტუაცია, რომლის დაძლევაც შეუძლებელია. მე მიმაჩნია, რომ ეს ერთ-ერთი იმ შემთხვევათაგანია, როდესაც ჩვენ ერთობლივი ძალისხმევით, რომელშიც ვგულისხმობ ეფექტურ მენეჯმენტს და მოსახლეების ძალისხმევას, რომლებიც უკვე წლებია ელოდებიან საკუთარი ბინების დასრულებას, ჩვენ შევძლებთ ამ სიტუაციიდან გამოსვლას. ჩვენი ამოცანაა ეს ყველაფერი საბოლოოდ დასრულდეს და თითოეულმა მოსახლემ მიიღოს ის, რაც ეკუთვნის, ანუ შევიდეს და იცხოვროს სახლში ნორმალურად.

მე უფრო ფართოდ შევეცდები აგიხსნათ ჩვენი პროგრამის: "ძველი თბილისის ახალი სიცოცხლის" ახალი ეტაპის მნიშვნელობა. მიმაჩნია, რომ ეს პროგრამა საბოლოო ჯამში თითოეულ თბილისელს ეხება. ის არის ძალიან მარტივი და არ გულისხმობს რაიმე რთულ ფორმულებს, კონკურსებს კომპანიებს შორის. ჩვენ ნებისმიერ მშენებელს, რომელსაც აქვს უკვე დაწყებული, ან სურს დაიწყოს ახალი მშენებლობა ვეუბნებით,რომ თბილისის მერია მზად არის, 400 დოლარად იყიდოს დასრულებულ შენობაში ერთი კვადრატული. ეს არის ის ფასი, რომელიც მშენებლობის თვითღირებულებასთან ახლოსაა. მაგრამ აქ აღსანიშნავია მთავარი მომენტი, თუ რატომ იღებს მერია ასეთ ვალდებულებას. ხომ შეიძლება თეორიულად, უამრავი ბინის მეპატრონე, ანუ მშენებელი მოვიდეს მერიაში და გვთხოვოს ბინების შესყიდვა, რასაც ბიუჯეტი შეიძლება ვერ გაწვდეს. თეორიულად ეს საფრთხე არსებობს, მაგრამ ჩემი აზრით, პრაქტიკულად ეს საფრთხე არ იარსებებს და გეტყვით რატომ. დღევანდელ სამშენებლო ბაზარზე არის შემდეგი ვითარება: განსხვავებით ევროპული ბაზრისაგან, ჩვენთან მოთხოვნა ბინაზე არის, თუმცა შემცირებულია მიწოდება და ნდობა. თუ ადრე ჩვენ ბაზარზე დაუმთავრებელი ბინები იყიდებოდა, დღეს ვითარება საგრძნობლად შეცვლილია. დღეს მხოლოდ და მხოლოდ ისეთ სახლებში იყიდება ბინა, რომელიც დამთავრებულია, ანუ ექსპლუატაციაშია მიღებული. თუ მშენებელი დაასრულებს ბინას, მაშინ მის გაყიდვაზე პრობლემა არ შეექმნება, ვინაიდან დღესდღეისობით, როგორც უკვე ავღნიშნე, ბინების შესყიდვაზე მოთხოვნა არის. ჩვენი წინადადება ფართის ექსპლუატაციაში მიღებიდან ერთი წლის განმავლობაში არის ძალაში, მშენებელს კი თავისმხრივ შესაძლებლობ აქვს მყიდველის არსებობის შემთხვევაში ბინა მისთვის ხელსაყრელ ფასად გაყიდოს.დასაქმების კუთხითაც მნიშვნელოვანია ეს პროგრამა, რადგან მშენებლობა არის ის სფერო, სადაც ყველაზე მეტი ადამიანია დღეს დასაქმებული. გარდა ამას, მშენებლობაზე არის მიბმული უამრავი სხვა სფერო, რომელიც დამატებით დასაქმების წყაროს წარმოადგენს. სტატისტიკა აჩვენებს, რომ ადამიანი, რომელიც ახალ ბინაში შედის, ახალ ტექნიკასა და ნივთებს ყიდულობა. ეს დამატებითი შემოსავალი და ბრუნვაა მაღაზიებისდთვის. ეს არის მთელი ინდუსტრია, რომელიც ლოკომოტივის სახითაა და მობმული ჰყავს უამრავი სხვა სფეროები. ერთი შენობის მშენებლობის გაჩერებამ შეიძლება ძალიან ბევრი სხვა მომიჯნავე სფეროს გაჩერება გამოიწვიოს. თითოეულ ახალმოსახლეს მინდა მივულოცო ამ შენობის დასრულება, რაც ოპტიმიზმს წარმოშობს სხვა მშშენობების დასრულების კუთხით. მე ძირითად ყველა მშენებელს სათითაოდ ვხვდები, მათ პრობლემებს განვიხილავ. მე ვალდებულება არც ერთი კომპანიის მიმართ არ მაქვს, ჩემთვის მთავარი ვალდებულება არის ის ხალხი, რომლებიც ამ კომპანიებში მუშაობენ, ჩემი მიზნობრივი ჯგუფია ყველა ის თბილისელი, რომელთაც ბინების მშენებლობაში თანხა აქვთ შეტანილი და მის დასრულებას ელოდებიან. ეს ერთ–ერთი წარმატებული დასასრულია იმ საფრთხისა, რომლის წინაშეც ჩვენ ვიდექით. ვფიქრობ, ამ სახლის მოსახლეთათვის ახალი ცხოვრება დაიწყება.

თბილისის მერი გიგი უგულავა ფოტოკონკურს"ქოლგას"გახსნას დაესწრო

ფოტოკონკურსი ქოლგა თბილისის მერიისა და თიბისი ბანკის ორგანიზებითა და კულტურისა და ძეგლთა დაცვის სამინისტროს, კომპანია ფოტოსამყაროს, საზოგადოებრივი მაუწყებლის, რადიო უცნობის, გაზეთ პრაიმთაიმისა და სავაჭრო ცენტრ თბილისი ცენტრალის მხარდაჭერით ტარდება. ფოტოკონკურსის საიუბილეო მეათე საზეიმო გახსნის ცერემონია სავაჭრო ცენტრ თბილისი ცენტრალში გაიმართა. კონკურსში მონაწილეობის მსურველთა განაცხადების მიღება 25 მარტს დასრულდა. მონაწილეთა რაოდენობამ საქართველოდან 300, ხოლო უცხოეთიდან 50 კონკურსანტი შეადგინა. კონკურსში სულ 4500 ფოტო იქნა წარმონდგენილი. დასკვნით ეტაპზე ნამუშევრების რაოდენობა 101- ით განისაზღვრა. ქოლგის გამარჯვებულთა დაჯილდოება 12 მაისს გაიმართება და მათ კომპეტენტური ჟიური გამოავლენს. ჟიურის წელს გერმანელი ფოტოგრაფი ვოლფგანგ ცურბორნი და ფოტოკრიტიკოსი თინა შელჰორნი წარმოადგენენ.თბილისის მერიამ სპეციალური საპრიზო ფონდი - 5000 ლარი დააწესა, რომელიც კონკურსის გამარჯვებულებზე გადანაწილდება.გიგი უგულავა: წლევანდელი ფოტოკონკურსი განსხვავებულია იმდენად, რამდენადაც მან არსებითად საერთაშორისო ხასიათი მიიღო. კონკურსში ძალიან ბევრი უცხოელი ფოტოგრაფი მონაწილეობს, ჟიურიც უცხოელებისაგან შედგება და რაც მთავარია ძალიან ბევრი საინტერესო ნამუშევრებია წარმოდგენილი, როგორც აზიის, ასევე ევროპის ქვეყნებიდან.

თბილისის მერმა გიგი უგულავამ ვეტერანებს ფაშიზმზე გამარჯვების დღე მიულოცა

ფაშიზმზე გამარჯვების დღე ევროპის ყველა ქვეყანაში 8 მაისს აღინიშნება. თბილისში მცხოვრები მეორე მსოფლიო ომის მონაწილეები კი დამკვიდრებული ტრადიციის თანახმად, გამარჯვების დღეს 9 მაისს ვაკის პარკში, უცნობი ჯარისკაცის საფლავთან შეკრებით აღნიშნავენ. სწორედ ამიტომ ფაშიზმზე გამარჯვების 66-ე წლისთავი თბილისის მერმა გიგი უგულავამ დღეს ვეტერანებს ვაკის პარკში მიულცა, ამ დღისადმი მიძღვნილ საზეიმო ღონისძიებას დაესწრო და უცნობი ჯარისკაცის საფლავს პატივი მიაგო.

თბილისში ამჟამად 1 348 ვეტერანი ცხოვრობს, მათ მერია ერთჯერადი ფულადი დახმარების სახით 200 ლარს გადასცემს და ქალაქის ყველა რაიონულ გამგეობაში ვეტერანებისთვის საზეიმო სადილი გაიმართება.

გიგი უგულავა: მინდა უკლებლივ ყველას მივულოცო ფაშიზმზე გამარჯვების დღე. საზოგადოებისთვის ცნობილია, რომ გარკვეული აზრთა სხვადასხვაობა არსებობს თარიღებთან დაკავშირებით, ობიექტურად მთელი მსოფლიო გამარჯვების დღეს 8 მაისს ზეიმობს. აქ შეკრებილი ხალხისთვის აქ მოსვლა ტრადიციაა და რომელი დღე იქნება ამას არსებითი მნიშვნელობა შეიძლება არ ჰქონდეს, მთავარია თანადგომა და ქედის მოხრა მათ წინაშე, ვინც თავი დადეს ფაშიზმთან ბრძოლაში.

თბილისის მერმა გიგი უგულავამ სამშენებლო და მოსაპირკეთებელი მასალების სავაჭრო ცენტრი გახსნა

თბილისში სამშენებლო და მოსაპირკეთებელი მასალების ახალი სავაჭრო ცენტრი გაიხსნა, რომელიც თბილისის მერმა გიგი უგულავამ და კომპანიის დირექტორმა გიორგი გორგოშაძემ გახსნეს და წარმოდგენილი პროდუქცია დაათვალიერეს. კომპანია თანამშრომლობს თბილისის მერიასთან და უახლოეს მომავალში სავაჭრო ცენტრში თბილისის მერიის დასაქმების მსურველთა ბაზიდან 5 ადამიანს დაასაქმებს. კომპანია „ბი–ემ–სი გორგია“ მსოფლიოში წამყვან მწარმოებელთა სამშენებლო და მოსაპირკეთებელი მასალების რეალიზებას წლების განმავლობაში წარმატებით ახორციელებს. კომპანიამ გაფართოვების მიზნით წერეთლის გამზირზე 7 000 კვ.მეტრ ტერიტორიაზე 2 სართულიანი სავაჭრო ცენტრი გახსნა, სადაც ამ სფეროში მოღვაწე მსოფლიოში ცნობილი ბრენდების პროდუქციაა წარმოდგენილი. მომხმარებელს შესაძლებლობა ექნება მაღალი ხარისხის პროდუქცია საბითუმო ფასად შეიძინოს. ახალ სავაჭრო ცენტრში 200 ადამიანი დასაქმდა.

გიგი უგულავა: ჩვენ გამოვაცხადეთ ახალი ეტაპი "ძვლი თბილისის ახალი სიცოცხლის" , რომლის მიხედვით არსებითად ყველა მშენებელს ეძლევა სტიმული უფრო ადვილად მოიპოვოს ფინანსური რესურსი, იმისათვის, რომ მშენებლობა დაიწყოს ან დაასრულოს. ჩვენ ვალდებულებას ვიღებთ პროგრამის ფარგლებში, ნებისმიერ დასრულებულ მშენებობაში 400 დოლარი გადავიხადოთ. ეს ფორმულა, ისევე როგორც ნებისმიერი სხვა სახის მშენებლობის სტიმულირება პირდაპირ არის მშენებლობის მომიჯნავე ბიზნესების განვითარებასთან დაკავშირებული, მაგალითად როგორიც არის ეს ბიზნესი. აქ 200 ადამიანი დასაქმდა. ჩვენი მთავარი საზრუნავი სამუშაო ადგილების შექმნაა და რაც უფრო მეტი სამუშაო ადგილი შეიქმნება, მით უკეთესია თითოეული თბილისელისათვის.

გიგი უგულავამ ძაღლების საერთაშორისო გამოფენა დაათვალიერა

თბილისში ჯიშიანი ძაღლების საერთაშორისო გამოფენა გაიმართა, რომელიც თბილისის მერმა გიგი უგულავამ დაათვალიერა. გამოფენა ერთი დღის განმავლობაში გაგრძელდა და მასში 40 სხვადასხვა ჯიშის 185 ძაღლმა მიიღო მონაწილეობა. გამარჯვებული ძაღლი უკრაინელმა მსაჯმა გამოავლინა, რომელსაც სიგელი, თასი და სხვადასხვა ფასიანი საჩუქრები გადაეცა. აღნიშნული გამოფენა წელიწადში სამჯერ იმართება, რაც ჯიშიანი ძაღლების პოპულარიზაციას უწყობს ხელს.

გიგი უგულავა: უკვე ტრადიციად იქცა, რომ თბილისში ძაღლების შეჯიბრება-კონკურსი იმართება. მე აქ ამ შემთხვევაში ერთ-ერთი მონაწილე ვარ, ჩემი ორი ძაღლი მონაწილეობს, ერთ-ერთი ეხლა შეჯიბრზე გადის, ვნახოთ რას იზავს.

თბილისის მერმა და კრაკოვის მერმა „კრაკოვის დღეები“ ოფიციალურად გახსნეს

თბილისსა და პოლონეთის ქალაქ კრაკოვს შორის, თანამშრომლობისა და მეგობრობის შესახებ დადებული ხელშეკრულების ფარგლებში, თბილისში კრაკოვის დღეები გაიმართა. შოთა რუსთაველის სახელობის სახელმწიფო აკადემიურ თეატრში თბილისის მერმა გიგი უგულავამ და კრაკოვის მერმა იაცეკ მაჩკოვსკმა „კრაკოვის დღეები“ ოფიციალურად გახსნეს. „კრაკოვის დღეები“ სხვადასხვა კულტურულ ღონისძიებებს მოიცავს. გახსნის ცერემონიაზე ჯარეკ სმიეტანის და პოლონური ჯაზ–კვარტეტის კონცერტი გაიმართა.

ჭადრაკში ევროპის ქალთა ინდივიდუალური ჩემპიონატი დაიწყო

თბილისში 6-დან 19 მაისის ჩათვლით, ჭადრაკში ევროპის ქალთა ინდივიდუალური ჩემპიონატი გაიმართება, რომელშიც 26 ქვეყნის 134 უძლიერესი მოჭადრაკე მიიღებს მონაწილეობას. ჩემპიონატის საპრიზო ფონდი 110 000 ევროს შეადგენს. შეჯიბრი შვეიცარული სისტემით 11 ტურად ჩატარდება და მისი მთავარი მსაჯი: მრავალგზის ოლიმპიური ჩემპიონი ნანა ალექსანდრია იქნება.

ევროპის ქალთა ინდივიდუალური ჩემპიონატი ჭადრაკში თბილისის მერმა გიგი უგულავამ, სპორტისა და ახალგაზრდობის საქმეთა მინისტრმა ლადო ვარძელაშვილმა, ჭადრაკის საერთაშორისო ფედერაციის „ფიდეს“ პრეზიდენტმა კირსან ილუმჟინოვმა და საქართველოს ჭადრაკის ფედერაციის პრეზიდენტმა გია გიორგაძემ გახსნეს.

გიგი უგულავა: სპორტის ეს სახეობა, განსაკუთრებით ქალბატონებში ტრადიციულად ჩვენი ქვეყნისთვის ერთ-ერთი საამაყო სპორტის სახეობას წარმოადგენს. ამიტომ ერთგვარად შეცდომის გამოსწორებაა, რომ სწორედ თბილისში ტარდება ასეთი რანგის ღონისძიება.

თბილისის მერიაში ჭადრაკში ევროპის ქალთა ინდივიდუალურ ჩემპიონატთან დაკავშირებით პრეს–კონფერენცია გაიმართა

თბილისში 6-დან 19 მაისის ჩათვლით ჭადრაკში ევროპის ქალთა ინდივიდუალური ჩემპიონატი გაიმართება, რომელშიც 26 ქვეყნის 134 უძლიერესი მოჭადრაკე მიიღებს მონაწილეობას. ჩემპიონატის საპრიზო ფონდი 110 000 ევროს შეადგენს. შეჯიბრი შვეიცარული სისტემით 11 ტურად ჩატარდება და მისი მთავარი მსაჯი: მრავალგზის ოლიმპიური ჩემპიონი ნანა ალექსანდრია იქნება. საერთაშორისო ტურნირის მაღალ დონეზე ჩატარების მიზნით, საორგანიზაციო კომიტეტი შეიქმნა, რომელსაც თბილისის მერი გიგი უგულავა ხელმძღვანელობს. საორგანიზაციო კომიტეტის შემადგენლობაში საქართველოს ჭადრაკის ფედერაციის პრეზიდენტი, ცნობილი ქართველი მოჭადრაკეები, სპორტისა და ახალგაზრდულ საქმეთა სამინისტროსა და თბილისის მერიის წარმომადგენლები შედიან. დღეს საორგანიზაციო კომიტეტის წევრებმა ჩემპიონატთან და წინა მოსამზადებელ სამუშაოებთან დაკავშირებით, პრეს–კონფერენცია გამართეს.


გიგი უგულავა: საზოგადოებისთვის ცნობილია, რომ ხვალ ოფიციალურად გაიხსნება ევროპის ქალთა ჩემპიონატი ჭადრაკში. თბილისი არის მასპინძელი ქალაქი. ჭადრაკის ფედერაციასთან და სპორტის და ახალგაზრდობის სამინისტროსთან ერთად, თბილისის მერია აქტიურად არის ჩართული საორგანიზაციო საკითხებში. ორი კვირის განმავლობაში ჭადრაკის გულშემატკივარს შესაძლებლობა ექნება, როგორც პირდაპირ ასევე ონლაინ რეჟიმში დააკვირდეს მისთვის სასურველ თამაშებს. მე დარწმუნებული ვარ, რომ ორგანიზაციული თვალსაზრისით ჩემპიონატი იდეალურად ჩაივლის და აქვე, როგორც გულშემატკივარმა, ჩვენს ქალბატონებს მინდა წარმატებები ვუსურვო. საქართველო სპორტის ამ სახეობაში და განსაკუთრებით ქალბატონებში, მოგეხსენებათ, რპმ ტრადიციულად ერთ-ერთი წარმატებული ქვეყანაა და მე იმედი მაქვს, რომ დღეს ჩვენს დედაქალაქში, საკუთარი გულშემატკივრის წინაშე ჩვენი ქალბატონები წარმატებას მიაღწევენ. სხვა მხრივ, ყველა ორგანიზაციული საკითხი დასრულებულია და ჩვენ უკვე დღეიდან ველოდებით დელეგაციებს. საკმაოდ წარმომადგენლობითია დელეგაციათა სიმრავლე და ამ ორი კვირის განმავლობაში ნამდვილი სპორტული ზეიმი იქნება, რაც საბოლოო ჯამში მნიშვნელოვანია, ჩვენი ქალაქის სპორტული ბიოგრაფიისთვის იმიტომ, რომ ჩვენ ამ ტურნირებით ვაგროვებთ ასე ვთქვათ, იმ ნდობის კრედიტებს, რაც კიდევ უფრო მეტი, ახალი და მნიშვნელოვანია სხვა სპორტის სახეობებში ტურნირების ჩატარებისთვის.

თბილისსა და ბუდაპეშტს შორის დაძმობილების მემორანდუმს მოეწერა ხელი

თბილისის მერმა გიგი უგულავამ და ბუდაპეშტის მერმა იშტვან ტარლოშმა თბილისსა და ბუდაპეშტს შორის დაძმობილების შესახებ მემორანდუმს მოაწერეს ხელი, რაც ორ ქალაქს შორის სხვადასხვა სფეროში ურთიერთობების განვითარებას ისახავს მიზნად.

მემორანდუმის თანახმად თბილისისა და ბუდაპეშტის მუნიციპალიტეტებს შორის თანამშრომლობა ეკონომიკურ, სოციალურ და კულტურულ სფეროებში განვითარდება.

ორი ქალაქი უზრუნველყოფს ერთმანეთს შორის ინფორმაციის გაცვლასა და გამოცდილების გაზიარებას შემდეგ სფეროებში: ადგილობრივი თვითმმართველობა, ქალაქის მართვა და საჯარო სამსახური, ურბანული დაგეგმარება და განვითარება, გარემოსა და ბუნების დაცვა, განათლება, კულტურა და ჯანდაცვა, ახალგაზრდებსა და არასამთავრობო ორგანიზაციებს შორის თანამშრომლობა.

ასევე ორი ქალაქის საქმიანი წრეების წარმომადგენლებს შორის ჩამოყალიბდება კომერციული და საქმიანი ურთიერთობები.

გიგი უგულავა: თბილისსა და ბუდაპეშტს შორის დაძმობილების მემორანდუმს მოეწერა ხელი, რომელიც ქალაქის საბჭოს გადაეცემა და მისი დამტკიცების შემთხვევაში უკვე საბოლოოდ გაფორმდება. მიმაჩნია, რომ ეს არის ძალიან მნიშვლელოვანი სიახლე თბილისისთვის, ვინაიდან თითოეული მეგობარი ქალაქი ჩვენთვის ღირებული და ძვირფასია. ის არის დამატებითი შესაძლებლობა კულტურული, საგანმანათლებლო და ეკონომიკური ურთიერთობების გაღრმავებისთვის. ამ თვალსაზრისით, ეს ფასდაუდებელი შენაძენი იქნება ჩვენთვის და მე დარწმუნებული ვარ, ჩვენი კოლეგებისთვისაც. თქვენ იცით, რომ რუსთაველის ქუჩა, ისევე როგორც რუსთაველის მონუმენტი გაიხსნა ქალაქ ბუდაპეშტში. შესაბამისად დღეს ჩვენ გვქონდა შესაძლებლობა უკვე განახლებულ ადგილას მიხაი ზიჩის ძეგლი გაგვეხსნა. ეს არის, ასე ვთქვათ, პატარა ნიშნები იმ დიდი ურთიერთობისა, რომელიც ჩვენს შორის ამიერიდან სულ უფრო გაღრმავდება და მე დარწმუნებული ვარ, ის ძალიან სასიკეთო შედეგს გამოიღებს თითოეული ჩვენთაგანისთვის. მე ვგულისხმობ პირველ რიგში ქალაქებს, ქალაქების მმართველობასa და უპირველეს ყოვლისა თითოეული თბილისელს.

ვარკეთილში პოლიციის ახალი შენობა გაიხსნა

თბილისს პოლიციის ახალი, თანამედროვე ტექნიკით აღჭურვილი შენობა შეემატა. ახალი განყოფილება ვარკეთილში აშენდა, სადაც 55 თანამშრომელი იმუშავებს, დასახლებას მოემსახურება და ადგილობრივი მოსახლეობის უსაფრთხოებაზე 24 საათის განმავლობაში იზრუნებს.
პოლიციის ახალი შენობა თბილისის მერმა გიგი უგულავამ და შინაგან საქმეთა მინისტრმა ივანე მერაბიშვილმა გახსნეს. 2008 წლიდან შინაგან საქმეთა სამინისტრომ თბილისის სხვადასხვა რაიონში პოლიციის განყოფილების ახალი შენობები ააშენა. პროექტი გრძელდება და უახლოეს მომავალში თბილისში პოლიციის კიდევ ოთხი ახალი განყოფილება დაიწყებს ფუნქციონირებას. პოლიციის ახალი შენობის მიმდებარე ტერიტორია თბილისის მერიამ კეთილმოაწყო.

გიგი უგულავა: დღევანდელი დღე ნამდვილად ღირსშესანიშნავია ვარკეთილისთვის. 2006 წლის არჩევნების წინ, როდესაც აქტიურად მიმდინარეობდა მოსახლეობასთან შეხვედრები, მათი აზრით ერთ–ერთი მთავარი პრობლემა, განსაკუთრებით ვარკეთილში, სხვადასხვა ტიპის დანაშაული იყო: მანქანისა თუ მისი ნაწილების ქურდობა, ყაჩაღობა, ძარცვა ქუჩაში და ა.შ. ამ ხუთი წლის განმავლობაში ყველაფერი შეიცვალა. შემიძლია პარალელი გავავლო 2010 წლის არჩევნების პერიოდთან, როდესაც მოქალაქეების დღის წესრიგიდან საერთოდ ამოვარდნილი იყო ნებისმიერი მოთხოვნა, რომელიც კრიმინალსა და მასთან ბრძოლასთან იყო დაკავშირებული. ეს პირველ რიგში არის სწორედ თქვენი დამსახურება, ხალხის ვინც აქ მუშაობთ და პრინციპი, როდესც ყველაფერი გამჭვირვალეა, არის საზოგადოებისთვის ნიშანი, რომ პოლიცია არის მათ სამსახურში. პოლიცია დღე და ღამ, კარგსა თუ ცუდ ამინდში არის თითოეული აქ მყოფი ადამიანის, თითოეული ჩვენი თანამოქალაქის სამსახურშია. ეს მნიშვნელოვანი სიახლე ადამიანს უქმნის დაცულობის განცდას და არის ის საფუძველი, რომელზეც უნდა აშენდეს ნებისმიერი ქალაქისა თუ ქვეყნის კეთილდღეობა. თუ ადამიანს არ აქვს იმის განცდა, რომ ქუჩაში გამოსვლისას ის დაცული იქნება, რომ ღამით ქუჩა განათებულია, კეთილმოწყობილია, პატრული დადის და პოლიცია მუშაობს, ამის გარეშე არც ბიზნესი განვითარდება, არც სამუშაო ადგილი შეიქმნება და საერთოდ არაფერი არ იარსებებს. ეს არის საფუძველი ნებისმიერი განვითარებისათვის.

თბილისის მერმა და ბუდაპეშტის მერმა მიხაი ზიჩის ხსოვნას პატივი მიაგეს

თბილისის მერმა გიგი უგულავამ და საქართველოში სტუმრად მყოფმა ბუდაპეშტის მერმა იშტვან ტარლოშმა უნგრელი მხატვრის მიხაი ზიჩის ხსოვნას პატივი მიაგეს და მისი ძეგლი გვირგვინით შეამკეს.

უნგრელი მხატვრის მიხაი ზიჩის ძეგლი, რომელიც თბილისში 1988 წელს გრიბოედოვის ქუჩაზე სამხატვრო აკადემიის წინ მდებარე სკვერში დაიდგა, სკვერის რეაბილიტაციის გამო, 2011 წელს ალექსანდრეს სახელობის ბაღში იქნა გადმოტანილი.

სხვა უამრავ ნამუშევართან ერთად, მიხაი ზიჩს შესრულებული აქვს შოთა რუსთაველის “ვეფხისტყაოსნის” ილუსტრაციაც.

თბილისის მერმა "დექსუსის" განახლებული მშენებლობა დაათვალიერა

კომპანია „დექსუსმა“ კიდევ ერთი შეჩერებული პროექტის მშენებლობა განაახლა. წყნეთში მდებარე საცხოვრებელი კომპლექსის სამუშაოების განახლებას თბილისის მერი გიგი უგულავა, კომპანიის დამფუძნებლები და ის მომხმარებლები დაესწრნენ, რომლებიც კომპლექსში კუთვნილი ფართების მიღებას წლების განმავლობაში ელოდებიან.

„დექსუსი“ აღნიშნული ობიექტის მშენებლობაში მილიონ ნახევარი ლარის ინვესტიციას განახორციელებს. საცხოვრებელი კორპუსის მშენებლობა მიმდინარე წლის პირველ ოქტომბერს დამთავრდება. პროექტის დასრულების შემდეგ კუთვნილ ფართს 30 მომხმარებელი მიიღებს.

გიგი უგულავა: გასული წლის შემოდგომიდან ,,ცენტრ პოინტის’’ მართვა კომპანია ,,დექსუსმა’’ დაიწყო და ეტაპობრივად იწყება ყველა დაგროვილი ვალდებულებების გასტუმრება. ამ ობიექტზე 30 ოჯახს ქონდა ნაყიდი ბინა. სულ მთლიანად წლის განმავლობაში ყველა მობინადრის, ანუ 52 % -ის დაკმაყოფილება მოხდება. ეს კარგი მაგალითია იმის, თუ როგორ შეიძლება ეტაპობრივად კარგი და მკაცრი მენეჯმენტით დაგროვილი პრობლემების მოგვარება. ეს განსაკუთრებით მშენებლობის სფეროს ეხება. სწორედ ამიტომ, ჩვენ წამოვიწყეთ პროგრამა, ,,ძველი თბილისის ახალი სიცოცხლის“ ახალი ეტაპი, რომელიც შეჩერებული მშენებლობების სტიმულირებას და ახალი მშენებლობების დაწყებას ემსახურება. ამ თვალსაზრისითაც, უკვე არის არსებითი გამოცოცხლება ბაზარზე და დარწმუნებული ვარ ეს გაზაფხული ძალიან გარდამტეხი იქნება თბილისში სამშენებლო ბიზნესის და ამ სფეროში დასაქმებული ადამიანებისთვის.

თბილისის მერმა გიგი უგულავამ ახალი საგამოფენო დარბაზი დაათვალიერა

ლადო გუდიაშვილის ოჯახის ინიციატივით და თბილისის მერიის, კულტურისა და ძეგლთა დაცვის სამინისტროსა და „თიბისი ბანკის“ მხარდაჭერით, გამოჩენილი ქართველი მხატვრის საცხოვრებელი ფართის ნაწილი საგამოფენო დარბაზად გადაკეთდა, სადაც დამთვალიერებელს შესაძლებლობა ექნება ლადო გუდიაშვილის შემოქმედებას გაეცნოს და დაათვალიეროს.

გიგი უგულავა: კიდევ ერთი საყვარელი ადგილი ექნებათ თბილისელებს ლადო გუდიაშვილის სახლ–მუზეუმის სახით. უკვე წლებია აქ მიდიოდა სამუშაოები და შედეგსაც თქვენ ხედავთ, არის შესანიშნავად გაკეთებული და რაც მთავარია ექსპოზიციაც არის ძალიან საინტერესო. ამითი რეალურად ჩვენ შეგვიძლია ვთქვათ თუ როგორი უნდა იყოს ზომის სტანდარტი. აქ ყველაფერი ისე არის გაკეთებული, რომ ადამიანმა ისიამოვნოს და სიამოვნება მიიღოს იმ ნამუშევრებით, რომლებიც გამოფენილია და ამავდროულად გარემოთი. ამას ძალიან დიდი მნიშვნელობა აქვს დღევანდელი მუზეუმის შექმნისას ეს ერთ–ერთი განმსაზღვრელია, ამიტომ ამ თვალსაზრისით მე მიმაჩნია რომ ეს ერთ–ერთი საუკეთესო სტანდარტია. ყველასათვის კარი უკვე ღიაა. შეუძლია ნებისმიერ დამთვალიერებელს, თბილისელსა თუ ქალაქის სტუმარს მოვიდეს და დატკბეს ამ ხელოვნებით და მთლიანად ამ გარემოთი.

პოლიციის ახალი შენობა თბილისის მერმა გიგი უგულავამ და შინაგან საქმეთა მინისტრმა ივანე მერაბიშვილმა გახსნეს

თბილისს პოლიციის ახალი, თანამედროვე ტექნიკით აღჭურვილი შენობა შეემატა. ახალი განყოფილება სამღერეთის ქუჩაზე აშენდა, სადაც 36 თანამშრომელი იმუშავებს, ლოტკინის  დასახლებას  მოემსახურება და ადგილობრივი მოსახლეობის უსაფრთხოებაზე იზრუნებს. 

პოლიციის ახალი შენობა თბილისის მერმა გიგი უგულავამ და შინაგან საქმეთა მინისტრმა ივანე მერაბიშვილმა გახსნეს.

2008 წლიდან შინაგან საქმეთა სამინისტრომ თბილისის სხვადასხვა რაიონში  პოლიციის განყოფილების თხუტმეტი ახალი შენობა ააშენა. პროექტი გრძელდება და უახლოეს მომავალში თბილისში პოლიციის კიდევ ხუთი ახალი განყოფილება დაიწყებს ფუნქციონირებას. პოლიციის ახალი შენობის მიმდებარე ტერიტორია  თბილისის მერიამ კეთილმოაწყო.

გიგი უგულავა: უსაფრთხო ქალაქის პროგრამა აქტიურად ხორციელდება წელსაც. იგი თავის თავში მთელ რიგ ღონისძიებებს მოიცავს. მნიშვნელოვანია, რომ თითოეულ რაიონსა და მუნიციპალიტეტში ახალი პოლიციის შენობა აშენდეს და ინოვაციური სამუშაო გარემო შეიქმნას. აღსანიშნავია სწორედ ის, რომ სიახლე არა თავად ახალი შენობა, არამედ მთელი ის ინფრასტრუქტურაა, რომელიც მას თან ახლავს. ეს არის მუშაობის ახალი სტილი, რომელმაც თავისი შედეგი უკვე გამოიღო იმ თვალსაზრისით, რომ თბილისი რეგიონში ერთერთ უსაფრთხო ქალაქად იქცა. რასაც მოწმობს ოფიციალური სტატისტიკაც. ამას განსაკუთრებული მნიშვნელობა აქვს ნაძალადევის რაიონის ლოტკინის ნაწილისთვის, იმიტომ, რომ ეს კრიმინოგენული თვალსაზრისით ტრადიციულად ერთ–ერთ რთულ უბნად შეიძლება ჩაითვალოს. მოსახლეობა აქ ხშირად წუხდა და გამოძახებები მრავლად იყო. ეს განყოფილება ფარავს თბილისის ზღვის მიმართულებას, სადაც ჩვენ ვგეგმავთ რეკრეაციული ფუნქციის გაძლიერებას. წელს მთლიანად შეკეთდება გზა. ასევე კეთდება საფეხმავლო ბულვარი. ზაფხულში ძალიან ბევრი თბილისელი დამსვენებელი ამოდის აქ. შესაბამისად აუცილებელია უსაფრთხოება და კომფორტი, რადგან უსაფრთხოება არის კომფორტის ერთ–ერთი ყველაზე მთავარი შემადგენელი ნაწილი და იგი უნდა იყოს უზრუნველყოფილი.

თბილისის მერმა გიგი უგულავამ ადგილობრივი ეკონომიკური განვითარების მეხუთე საერთაშორისო ფორუმი გახსნა

თბილისის მერიისა და გერმანიის საერთაშორისო თანამშრომლობის საზოგადოება GIZ–ის ორგანიზებით, სასტუმრო „რედისონ ბლუ ივერიაში“ ადგილობრივი ეკონომიკური განვითარების მეხუთე საერთაშორისო ფორუმი გაიხსნა. ფორუმში მონაწილეობა მიიღეს დამოუკიდებელმა ექსპერტებმა, ადგილობრივი ხელისუფლების, ქალაქებისა და რეგიონების სახელმწიფო სტრუქტურებისა და არასამთავრობო ორგანიზაციების წარმომადგენლებმა. ფორუმი გაერთიანებული ერების განვითარების პროგრამის, მსოფლიო ბანკის, ქალაქების ალიანსის, ევროპის საბჭოსა და სხვა საერთაშორისო ორგანიზაციების მხარდაჭერით ტარდება.

ადგილობრივი ეკონომიკური განვითარების მეხუთე საერთაშორისო ფორუმი თბილისის მერმა გიგი უგულავამ გახსნა და ფორუმის ფარგლებში ბუდაპეშტის მერს იშტვან ტარლოშს, ჰააგის მერის მოადგილეს ჰენკ კულს, ევრო სითის გენერალურ მდივანს პოლ ბევანსა და აშშ–ის ხმის ჩაწერის, ხელოვნებისა და მეცნიერების ეროვნული აკადემიის პრეზიდენტს ნილ პორტნოუს შეხვდა.

გიგი უგულავა: უკვე მეხუთე წელია, რაც ყოველწლიურად თბილისის ეკონომიკური ფორუმი თბილისის მერიისა და სხვადასხვა დონორი ორგანიზაციების მხარდაჭერით ტარდება. ჩვენი ფორუმის ძირითადი მიზანი არის იმ გამოწვევების ანალიზი, იმ პროგრამების შეჯამება და ახალი პროგრამების დაგეგმვა, რომლებიც ჩვენ შემთხვევაში თბილისის და ზოგადად ურბანულ განვითარებას უკავშირდება. ქალაქის ეკონომიკა არის ნებისმიერ ქვეყანაში ეკონომიკის წამყვანი ძალა. საუბარია ეკონომიკის სტიმულირებაზე, ახალი სამუშაო ადგილების შექმნის პერსპექტივაზე, იმაზე თუ რა მიმართულებები უნდა განავითაროს თითოეულმა ქალაქმა, რა არის მისთვის ალტერნატიული მახასიათებელი, იმისთვის რომ მოხდეს ეკონომიკის დივერსიფიცირება, რათა ეკონომიკა არ იყოს ჩაკეტილი და რომელიმე დიდ სფეროებზე მიბმული. ეს მნიშვნელოვანია ისევ და ისევ, საბოლოო ჯამში, სტაბილური სამუშაო ადგილების შექმნისთვის. ეს არის ძირითადი აზრი და მიზანი იმ დისკუსიისა, რომელიც ქალაქების განვითარებას ეხება და ამ თვალსაზრისით ეს ფორუმი წლიდან წლამდე უფრო მრავალფეროვანი ხდება. ეს არის ძირითადი მიზანი და არსი ამ კონფერენციისა, რომელიც ორი დღის განმავლობაში გაგრძელდება და იმედი მაქვს, რომ მონაწილეებისთვის საინტერესო იქნება.

თბილისის მერი გიგი უგულავა თბილისის განვითარების სტრატეგიის ფორუმს დაესწრო

თბილისის მერიისა და მსოფლიო ბანკის ინიციატივით სასტუმრო „თბილისი მარიოტში“ თბილისის განვითარების სტრატეგიის ფორუმი გაიმართა. ფორუმში მონაწილეობა მიიღეს საერთაშორისო, სახელმწიფო, არასამთავრობო და ბიზნესს ორგანიზაციების წარმომადგენლებმა. ასევე დამოუკიდებელმა ექსპერტებმა და საზოგადო მოღვაწეებმა. თბილისის განვითარების სტრატეგიაზე თბილისის მერიის ეკონომიკური პოლიტიკის სამსახური და მსოფლიო ბანკი ერთობლივად მუშაობენ. პროექტი ქალაქების ალიანსისა და მუნიციპალური განვითარების ფონდის მხარდაჭერით ხორციელდება.განვითარების სტრატეგიის ფორუმი თბილისის მერმა გიგი უგულავამ გახსნა და მის მონაწილეებს სიტყვით მიმართა. ფორუმის მსვლელობისას მსოფლიო ბანკის წარმოამდგენლობის ხელმძღვანელმა ასად ალამმა პრეზენტაცია გამართა და ქალაქების განვითარებაში სტრატეგიის მნიშვნელობასა და საერთაშორისო გამოცდილებაზე ისაუბრა.ფორუმის მსვლელობისას მონაწილეები ქალაქის პროფაილს გაეცნენ, რომელიც თბილისის განვითარების სტრატეგიის ფარგლებში შემუშავდა და ის ქალაქის დღევანდელ სიტუაციას აღწერს.გიგი უგულავა: წარმოვადგინეთ ერთგვარი ქალაქის “პროფაილი”. ეს არის ის ინფორმაცია, რაც აუცილებელია გრძელვადიანი სტრატეგიისთვის. ამ საბაზისო დოკუმენტზე მუშაობა მთელი წლის განმავლობაში მიდიოდა ექსპერტებთან ერთად. ეს “პროფაილი”იძლევა საშუალებას ყველა მიმართულებით განვსაზღვროთ ის პრიორიტეტები, რაც თბილისისთვის და თბილისელებისთვის უახლოესი 10-20 წლის განმავლობაში მნიშვნელოვანი იქნება. მაგალითად, ერთ კონკრეტულ მაგალითს მოვიყვან: უმაღლესი სასწავლებლები უშვებენ სტუდენტებს და მნიშვნელოვანია რა შრომის ბაზარი დახვდებათ მათ. დღეს ერთ-ერთი პრობლემა სწორედ ის არის, რომ ის სპეციალობები, რომლებიც მოთხოვნადია, შრომის ბაზრის ადეკვატური არ არის. ანუ შრომის ბაზარზე ამ პროფესიით ადამიანმა შეიძლება სამსახური ვერ იპოვოს. ეს ერთი პატარა მიმართულებაა, თუმცა ძალიან მნიშვნელოვანი იმ უამრავი პრობლემატიკისა, რაც ქალაქს დროის დინამიკაში სჭირდება. თუ ადამიანი სწავლობს, სწავლობს იმიტომ, რომ შემდეგ დასაქმდეს. თუ შრომის ბაზარი მას ვერ შესთავაზებს ადეკვატურ სამუშაო ადგილს, მაშინ გამოდის, რომ ამ სწავლას აზრი არ აქვს. ამიტომ ჩვენ უნდა ვიცოდეთ, როგორი იქნება შრომის ბაზარი უახლოესი 10-20 წლის განმავლობაში და შესაბამისად საზოგადოებას შევთავაზოთ ამ სპეციალობებზე რეორიენტაცია იმისათვის, რომ ადამიანი თავიდანვე არ იყოს განწირული უმუშევრობისთვის. არის უამრავი ეკოლოგიური მიმართულება, ტრანპორტის მართვის მიმართულება, ურბანიზაცია, განსახლება, ქალაქის ენერგო ეფექტურობა და ა.შ. ეს არის წყება მიმართულებებისა, რომლებიც თუ არ გვეცოდინება საითკენ მიდის, იმ მოულოდნელობების წინაშე აღმოჩნდება თბილისი, თბილისის მმართველობა და თბილისელები, რაც შემდგომ უფრო რთულ და ბევრ პრობლემას წარმოშობს. ამ თვალსაზრისით, ეს არის ძალიან მნიშვლელოვანი სასტარტო ეტაპი დოკუმენტისა, რომელზეც ვიწყებთ ექსპერტებთან და სხვა დაინტერესებულ პირებთან ერთად მუშაობას და საბოლოო ჯამში ეს იქნება განმსაზღვრელი დოკუმენტი თბილისის სამოქმედო გეგმისა და თბილისელებისთვის, თუ როგორი იქნება ჩვენი ქალაქი 10 და 20 წლის შემდეგ.